fbpx

【香港】「火星衝日」明晚登場!未來11年內最大最亮一次!

12 月 7, 2022 | 香港, 熱話

☉ 瀏覽次數 : 842

火星衝日將會喺2022年12月8日登場,睽違2年再度運行到「衝」嘅位置,今次仲係未來11年內最大、最亮嘅火星衝!

當火星運行到同太陽、地球排列成一直線嘅時候,就會產生火星衝嘅現象。因為地球位於火星與太陽之間,喺太陽光線照射下,身處地球上可以清楚觀察到火星樣貌。

火星衝大約每2年發生一次,火星衝發生時,火星離地球越近,越清晰可以觀察到火星樣貌。但由於火星運轉軌道並非正圓形,每次火星衝位置、距離都唔太相同,影響埋每次睇到火星衝嘅亮度、大小都會有些微差距。




火星衝發生時,太陽同火星嘅位置相反,火星會喺接近日落時分升起,並喺日出時落下,火星顏色將會呈現明顯偏黃或偏紅。

今年嘅火星衝將會喺12月8日13時42分,亮度高達-1.9星等(恆星天狼星為−1.45),距離地球只有0.55天文單位(約8250萬公里),有機會睇到火星極冠、淺色平原區、暗色高地區等火星上嘅地表奇觀。

雖然火星衝唔算罕見,未來2025、2027、2029同2031年都有機會觀賞,但都比今年火星衝細同暗,下一次想要睇到更大更亮嘅火星衝要等到2033年,今次大家要把握機會啦!

*以上資訊只供參考,如有任何變化或更改均以現場情況或商戶決定為準*

Klook.com
X