fbpx

【鈴芽之旅】8大取景地點集合 新海誠帶你穿梭日本九州、四國、關東等地

3 月 18, 2023 | 日本, 熱話

《鈴芽之旅》係新海誠「災難三部曲」嘅最後一章。故事講述九州嘅17歲少女鈴芽同一名神秘青年草太一齊展開嘅關門之旅,為咗阻止災難發生。作品通過穿梭日本九州、四國、關東等地,展現出優異嘅作畫品質同精湛嘅動畫表現,令觀眾留下深刻嘅印象。

呢部電影係新海誠獻俾311大地震後日本社會嘅暖心之作,穿梭日本各地,令人仿如睇緊觀光宣傳片。自電影上映後,觀眾紛紛尋找拍攝聖地,以下就為大家介紹8處標誌性嘅《鈴芽之旅》場景。

1. 佐賀關港

鈴芽同埋椅子草太追住大臣跑去船上,開始除災之旅,登船嘅港口就係九州大分市嘅「佐賀關港」。呢度搭船去四國最短只需70分鐘,附近有好多景點,例如豐後水道天文台、海卵水族館,唔怕等船時無嘢做。




==========

2. 八幡濱港

鈴芽同埋草太追住大臣去四國,登岸嘅港口係八幡濱港,取名自7世紀嘅「八幡神社」。八幡濱港每年8月都會舉辦煙火大會,市內有著名菜式「八幡濱雜錦麵」,湯底採用雞骨熬出,加埋蔬菜同五花肉,真係好想食呀!

==========

3. 大洲城

鈴芽同埋草太跟住大臣搭火車,經過大洲城,係2006年被選為「日本100名城」第82名。建於江戶初期,1888年天守閣因老化而倒塌,後嚟經居民請願及募資修復,2004年重見天日。下次去愛媛,可以去睇睇呢個文化遺產。

==========

4. 明石海峽大橋

喺四國旅館,小朋友指住電視睇「小貓過橋」,鈴芽見到呆咗,原來就係明石海峽大橋!呢條橋係世上跨距第二長,橋塔第三高,連接兵庫縣神戶市同淡路市,長達3,911米,高達298.3米,1998年通車,經歷過阪神大地震,仲係好穩陣㗎!

==========

5. 神戶童話之國

椅子草太同大臣嘅追逐戰,就喺遊樂場「神戶童話之國」進行。依家呢個遊樂場仲係開放中,除咗摩天輪,仲有其他遊樂設施,入場免費,遊樂設施收費都係300至400日圓。呢個遊樂場係「Fruit & Flower Park」嘅一部分,公園仲有BBQ、車仔及單車等活動,好啱一家大細嚟玩!

==========

6. 聖橋

椅子草太為咗制止災難,從聖橋一躍而下,鈴芽都跟住跳咗落去。聖橋係東京有名嘅藝術建築,建於1927年,2017年被選為「土木學會選獎土木遺產」。橋北面有湯島聖堂,南邊有東京復活大聖堂,故稱「聖橋」。晚上會亮燈,好浪漫!

==========

7. 道之駅「大谷海岸」

鈴芽同芹澤嘅跑車蓋壞咗,就去大谷海岸嘅道之駅避雨。劇中芹澤食咗一碗好美味嘅海鮮拉麵,現實真係可以去道之駅食到!呢個地方提供當地豐富海鮮,仲有美麗海景,實在太誘人啦!

==========

8. 織笠駅

新海誠監督嘅作品經常以男女主角喺車站重逢或分別作為標誌,而《鈴芽之旅》嘅車站就係岩手縣嘅織笠駅。呢個車站曾經荒廢,再加上2011年嘅地震同海嘯,直至2019年先完成修復。由《秒速5厘米》、《你的名字》到《鈴芽之旅》,新海誠筆下嘅車站點可以唔去朝聖呢?

圖片及資料來源 : ig@suzume.hk

*以上資訊只供參考,如有任何變化或更改均以現場情況或商戶決定為準*

Klook.com
X