CFAR旅遊保險香港｜分手都可能有得賠？一文睇清保障、賠償比例及投保期限
📲 加入WhatsApp Channel「OpenHolidays 飛常著數」，快人一步收到機票、酒店、旅遊保險同信用卡優惠提醒；優惠碼只喺Channel公布！👉 https://bit.ly/ohotarticle
訂好機票酒店，點知出發前一個月先發現另一半出軌，人可以唔要，但幾千蚊旅費點算？好多人以為買咗旅遊保險就穩陣，其實一般旅遊保險嘅「取消行程」保障，分手係唔包嘅。
不過有部分旅遊保險設有 CFAR（Cancel For Any Reason） 保障，就算唔係意外，取消行程都有機會賠返部分旅費。以下一文睇清 CFAR 係咩、包邊啲情況、買之前要留意咩，出發前 Save 低就唔使蝕成筆錢。
一、一般旅遊保險取消行程，其實只包突發事件
一般旅遊保險嘅「取消行程」保障，通常只係包一啲非自願、不可預見嘅情況。常見受保原因包括：
- 受保人或家人身故、重病或受重傷（需醫生證明）
- 政府強制隔離、法庭傳召或擔任陪審員
- 香港住所嚴重損毀
- 目的地發生天災、暴動或恐怖襲擊
- 政府對目的地發出紅色或黑色外遊警示（視乎保單）
✗ 一般唔包嘅情況：改變主意、公司太忙請唔到假、簽證申請失敗、同旅伴反面，當然仲有分手。
⚠ 各保險公司嘅受保原因都唔同，以保單條款為準
二、CFAR係咩？唔係意外都可以賠返部分旅費
CFAR 全寫係 Cancel For Any Reason，即係「因任何原因取消行程」。就算取消原因唔喺傳統受保範圍，都可以賠返部分已付而不可退款嘅旅費，例如機票同酒店訂金。
賠償比例：一般賠返不可退款部分嘅 50% 至 75%，唔係全數退。
賠償上限：每間保險公司唔同，大約 $20,000 至 $25,000。
換句話講：如果你嘅機票酒店合共 $10,000 而又退唔到錢，有 CFAR 就有機會攞返 $5,000 至 $7,500。
部分保險公司嘅類似保障叫「因任何不可預見原因取消行程」，範圍同 CFAR 可能有少許分別，買之前要睇清條款（來源）。
三、唔只分手！CFAR有機會包嘅6個情況
以下情況一般旅遊保險未必包，但有CFAR或類似彈性取消保障，就有機會獲賠：
- 分手或同旅伴反面：出發前發現另一半出軌，或者同朋友吵到唔想一齊去。
- 公司唔批假、突發工作：老闆臨時要你頂project，假期要取消。
- 寵物病咗：貓狗突然要入院，放唔落心。
- 簽證延誤：簽證遲咗批，趕唔切出發。
- 活動取消：專登飛去睇嘅演唱會或活動取消咗。
- 突然唔想去：部分保單就算純粹改變主意，符合條件都有機會賠。
⚠ 各間保險公司列明嘅例子唔同，例如簽證延誤同活動取消係安聯官網有列明，其他公司要視乎保單條款（安聯、HongKongCard）。
四、買CFAR之前要留意3件事
1. 要趁早買，唔可以臨出發先買
大部分CFAR要喺付訂金或訂機票之後指定日數內買，例如7日或30日內；有啲則要出發前最少6日買。所以一訂完機票，就應該即刻研究旅遊保險。
2. 要喺出發前取消
例如安聯要求最少喺出發前24小時，通知航空公司或酒店取消。
3. 只賠不可退款嘅部分
航空公司或酒店可以退返嘅錢，唔會再賠；賠償亦只係不可退款部分嘅指定百分比。
Claim時一般要準備：
- 付款收據
- 航空公司或酒店嘅取消確認
- 證明款項不可退還嘅文件
五、邊幾間旅遊保險有CFAR？
以下資料整理自2026年4月更新嘅公開資料，只供參考，條款以各保險公司最新保單為準。
| 保險計劃 | 保障名稱 | 賠償比例 | 賠償上限 | 購買期限 |
|---|---|---|---|---|
| FWD「自寫意旅遊保」頭等計劃 | 因任何原因取消行程 | 50% | $25,000 | 付首期或訂金後30日內 |
| 安聯Allianz旅遊金計劃 | 因任何不可預見原因取消或更改旅程 | 75% | $20,000 | 出發前最少6日 |
| MSIG三井住友 iTravel Go 計劃A | 因任何原因取消旅程 | 50% | $25,000 | 付款或訂位後7日內 |
六、CFAR常見問題
Q：買咗一般旅遊保險，係咪自動有CFAR？
唔係。CFAR只係部分計劃內置，或者要另加保費買附加保障，買之前要睇清保障表。
Q：CFAR係咪會賠全數旅費？
唔係。一般只賠不可退款部分嘅50%至75%，仲要受賠償上限限制。
Q：已經訂咗機票好耐，仲買唔買得到CFAR？
視乎保險公司嘅購買期限，有啲要喺付訂金後7日內買，過咗就可能唔包。
加入OpenHolidays飛常著數
想第一時間知道機票、酒店、旅遊保險同旅遊信用卡優惠？加入WhatsApp Channel「OpenHolidays 飛常著數」，快人一步收到限時優惠同開搶提醒。每日1至3個精選情報，優惠碼只喺Channel公布！
