越式牛河喺香港一直都好受歡迎，近年越南食店仲愈開愈多！
究竟邊間好食？邊間夠地道？
如果你都想食返碗性價比高嘅越南牛河…
咁就一次過睇哂港九新界必食嘅六間越式粉麵店先啦！
(排名不分先後～～)

===========================================

1. 荃灣 – 越北牛肉粉
食越南菜，當然要試佢嘅綜合生牛肉湯粉！
生牛肉用滾湯淥熟，另外仲有牛腩片、牛丸等，牛味濃郁！
啱晒一眾牛魔王呀！

INFO.
地址：荃灣眾安街68號荃灣千色匯1期1樓1023號舖

===============

2. 佐敦 – 火五越式牛肉粉專門店
呢度嘅火車頭牛肉粉期待值相當高！
湯底濃郁，皆因係以牛骨加上16種香料，經過低溫煲煮超過8小時而成！
而食材亦相當有水準，牛丸多汁有口感，
仲有生牛肉、熟牛肉同扎肉，夠哂豐富呀！

INFO.
地址：佐敦白加士街55號其昌樓地舖

===============

3. 灣仔 – 西貢街頭越南牛肉粉
唔少人都被佢嘅門面吸引而幫襯，但其實佢嘅生牛肉湯河粉亦相當高質！
生牛肉份量十足，口感適中～充滿肉香！
河粉亦相當滑身，湯底鮮甜，香氣四溢！

INFO.
地址：灣仔克街6號廣生行大廈C及D座地下4-6號舖

===============

4. 油麻地 – 越發地道河內料理
位於油麻地砵蘭街有間小店以河內美食為主打～
雖然成日都排長龍，但依然值得等！
店內最出色嘅牛柳牛丸河你當然唔可以錯過！
牛丸好正宗，充滿肉汁！而半熟牛柳亦好腍身！
湯底亦係用牛骨長時間熬製而成，相當清甜！
至於河粉就係由越南進口，帶有米香～
仲有自家製辣椒醬，用嚟蘸牛肉就最合適不過！

INFO.
地址：油麻地砵蘭街99號地下

===============

5. 粉嶺 – 越瀧棧
呢間位於聯和墟嘅越南餐廳，裝潢別具風情，而且仲好抵食㗎！
佢嘅生牛肉湯河性價比高！
清甜嘅湯底，加上薄薄嘅牛肉片，非常入味！
真係令人一試難忘呀！

INFO.
地址：粉嶺聯和墟聯和路3-5號富貴樓地舖

===============

6. 中環 – 越僑
中環想揾啲經濟又好味嘅餐廳？
呢間越南粉麵餐廳就啱喇！
佢嘅生牛肉份量足，而且好嫩滑！
重點係湯底好濃，而白蘿蔔嘅甜味更加令成個湯底昇華，
令人忍唔住要飲多幾啖！！

INFO.
地址：中環租庇利街鐵行里12號地下

*以上資訊只供參考，如有任何變化或更改均以現場情況或商戶決定為準*