飲哂飲品嘅膠樽除咗可以拎去資源回收外，仲可以有咩用途呢？原來可以變成建築嘅一部分！瑞典建築事務所UMA近期提議使用膠樽嚟建造墨西哥一所藝術學校嘅外牆，期望為當地社區樹立一個正面積極嘅榜樣，睇到呢面藝術牆嘅同時思考一下膠樽除咗丟棄外，亦能透過其他方式賦予新嘅意義。

墨西哥每年製造約50萬噸嘅塑膠垃圾，大部分都漂流到海上。UMA決定以回收膠樽替墨西哥藝術學校打造「NEW WAVE」牆面。將每個膠樽先塗上藍白漸變色，並將膠樽鑽窿後，由鋼筋連接，彎曲到特定位置後形成波浪弧度，考慮到結構嘅穩定，靠近地面嘅膠樽以水泥同沙填充，而所有鋼筋都會固定到牆上。

呢面牆唔只係一個巨大藝術品，仲可以遮太陽避雨，甚至仲可以作為座位同檯使用。UMA希望探索回收膠樽可以做到嘅極限，並喺呢件事上開創先河，製作充滿創意嘅巨浪牆，希望引起好奇心，提醒人膠樽究竟從何而來、又應該從何而去。

膠樽變成裝置藝術品，成為開放大眾互動式體驗，仲詮釋咗藝術家想傳達嘅訊息，或許比起普通咁疾呼環保理念，諸如此類嘅環保裝置藝術，反而更能喚起心中對於生態環境嘅反思。

*以上資訊只供參考，如有任何變化或更改均以現場情況或商戶決定為準*