【日本地震】香港人去日本地震指南！防震3步驟/避難標示/求助電話懶人包

日本始終位處地震帶，去旅行隨時都有機會遇上地震。日本雖然防災設施做得好足，但始終我哋身處異地，遇上突發強震難免會慌張。

為咗玩得開心又安心，OpenHolidays準時咗日本地震指南，由出發前嘅準備、地震當刻嘅應變步驟、避難標示點樣睇，到震後報平安嘅免費 Wi-Fi 同埋緊急求助電話都一應俱全。建議大家出發前一定要 Save 低呢篇文，有備無患！

出發前先確認 6 件防災準備

去旅行最緊要安全，出發前花幾分鐘做足以下準備，萬一遇上突發狀況就可以臨危不亂：

1. 下載官方防災 App： 預先下載日本觀光局專為外國旅客設計嘅「Safety Tips」官方防災 App。

2. 開啟通知與定位： 確保手機開啟咗緊急通知同埋 GPS 定位，咁先可以第一時間收到地震速報。

3. Cap 低酒店日文地址： 預先將酒店嘅日文地址同電話 Cap 圖，萬一要問路或者求助，救援人員都可以即時知你住邊。

4. 隨身裝備要帶齊： 出街記得帶實「尿袋」（流動充電器）確保手機有電，並帶備少量現金同常用藥物。

5. 約定失聯集合點： 同同行親友夾定，萬一走散又斷網，就去酒店大堂或者附近嘅大型避難所集合。

6. 買齊旅遊保險： 出發前一定要買旅遊保險，並睇清楚條款有冇包天災引致嘅行程延誤同醫療保障。

發生地震時先做 3 步保命動作

當你聽到手機發出地震警報，或者感覺到強烈震動時，最緊要保持冷靜，第一時間要「保護頭頸」：

1. 伏低： 立即蹲低身子，穩定身體重心。

2. 護頭： 用隨身手袋、背囊或者雙手，緊緊保護頭部同頸部。

3. 穩住： 捉實身旁穩固嘅物件（例如堅固嘅枱腳），直到震動完全停止。

⚠️ 4 個即時安全提醒

• 遠離危險物： 即時遠離玻璃窗、高櫃同吊燈，防止被跌落嚟嘅雜物壓傷。

• 唔好即刻衝出去： 盲目衝出街好容易被外牆跌落嚟嘅石屎、招牌或者玻璃碎片擊中。

• 嚴禁搭升降機： 千祈唔好用𨋢！如果震嗰陣喺𨋢入面，即刻撳晒所有樓層，一開門就盡快離開。

• 震停先跟指示移動： 等震動完全停止後，先聽從場館或酒店職員嘅指示安全撤離。

🏢 唔同場景點樣做？

• 街上： 遠離大廈外牆同招牌，去空曠地方。

• 電車 / 地鐵： 緊握扶手，小心急停跌倒，千祈唔好自己亂開車門，留喺車廂等職員指示。

見到標示就知去邊！認清日本避難所

去日本旅行，認住街上綠色嘅避難資訊牌非常重要：

• 避難場所： 災後暫時安置嘅地點（例如公園、廣場）。

• 緊急避難場所： 地震或火災發生時，第一時間要去嘅安全地方（例如學校操場）。

• 津波避難場所 / 避難ビル： 萬一遇上海嘯，即刻向高處走嘅避難大樓。

🌊 近海地區最重要警告：

如果你身處海邊，只要感受到強烈地震，唔好等海嘯警報，必須立即離開海邊及河口，向高地或避難大樓狂奔！

📶 震停之後點報平安？善用免費 Wi-Fi「00000JAPAN」

地震發生後，先留意有冇餘震、火警或碎玻璃。由於災後電話網絡通常會大塞車，建議優先用短訊或網絡訊息報平安。

如果自己張 SIM 卡上唔到網，日本喺大型災害發生時，部分地區會開放緊急免費 Wi-Fi：

• 網絡名稱： 00000JAPAN

• 特點： 唔需要密碼，所有旅客都可以即時連線。

• ⚠️ 注意： 呢個係公共無加密 Wi-Fi，安全性較低，千祈唔好登入網上銀行或輸入重要個人資料，只用作報平安同搵資訊。

Cap 低佢！港人遊日緊急求助方法

建議大家將以下呢個表格 Cap 圖，或者將號碼 Save 落電話，遇到緊急情況就唔使騰雞：