錦田鄉村俱樂部花海2026|免費睇波斯菊+百日菊!交通+花期+親子玩樂攻略

錦田鄉村俱樂部花海2026|免費睇波斯菊+百日菊!交通+花期+親子玩樂攻略

香港
By May chan on 19 Nov 2026

📲 加入WhatsApp Channel「OpenHolidays 飛常著數」,快人一步收到泰國平機票、酒店快閃、Klook/KKday優惠碼及開搶提醒!👉 https://bit.ly/ohotarticle

唔使飛日本,香港都有超夢幻秋日花海!近日Threads瘋傳位於元朗嘅錦田鄉村俱樂部,一大片粉紫色波斯菊配上黃、橙、紅色百日菊盛開,再加雞公嶺山景同藍天做背景,影出嚟勁有歐洲鄉郊Feel。

截至2026年11月19日,花海仍然盛開中,最新資料預計花期可以維持至11月底至12月初,實際情況視乎天氣及花況而定。最正係散客可以免費入場、毋須預約,自駕人士亦有泊車位置,想趁秋天天氣舒服去影相可以把握今個花期。

錦田花海|波斯菊+百日菊一齊盛開

今次錦田花海主要有兩大主角:

🌸 粉紫色波斯菊
粉紅、紫紅色花瓣一大片盛開,配藍天影人像特別柔和。

🌼 繽紛百日菊
黃色、橙色、紅色同粉紅色交錯生長,再加後方雞公嶺山景,畫面層次非常豐富。

花田旁設有指定拍照位置,想影到置身花海效果,可以用借位或者長焦鏡頭,記得唔好踩入花叢或者採花,一齊保護花田。

錦田花海|最佳打卡時間

官方分享過幾個影相貼士:

📸 早上或黃昏去:陽光比較柔和,花海顏色自然啲,人像亦冇咁易爆光。
👗 著白色/淺色衫:花田本身顏色已經好豐富,淺色衣着會更加突出。
🌸 企指定位置影:利用角度同長焦已經可以做到置身花海效果,唔需要行入花叢。

除咗賞花,錦田鄉村俱樂部仲有咩玩?

錦田鄉村俱樂部本身係一個戶外親子玩樂場地,除咗睇花,場內亦有多款親子活動同設施:

🚗 親子遊樂:碰碰車、兒童跳彈床、兒童車等
🐑 餵小動物:可以近距離餵小羊、兔仔等
🎨 DIY手作:焗畫、沙畫、木板畫等活動
🔥 戶外BBQ:適合一家人或者朋友一齊燒烤

官網列明,場內遊樂設施主要逢星期六、日及公眾假期正常開放,設施及活動需要另外收費;散客假日不設預訂,需即場安排,而且全場只收現金。

錦田鄉村俱樂部|遊樂設施收費參考

🚙 飛碟碰碰車:$60/10分鐘
🤸 兒童跳彈床:$30/10分鐘
🐑 小羊/兔仔飼料:$20/包

其他DIY、遊戲及活動亦有不同收費,實際價錢及開放情況以場方即日公布為準。

入場免費?帶食物入場要留意

錦田鄉村俱樂部官網列明,小家庭式參觀可以免費入場;不過如果自攜食物入場野餐,則大小同價每位$30。

星期六、日及公眾假期散客不設預約,要即場安排;場內只接受現金付款,所以打算玩設施或者買飼料,記得出發前準備現金。

錦田鄉村俱樂部|開放時間

星期一至五:10:00-18:00
星期六、日及公眾假期:10:00-22:00

官網亦提醒,夏天期間星期一至日有機會全場18:00收場,開放時間可能因季節或場方安排而調整,出發前最好再留意最新公布。

錦田鄉村俱樂部|交通方法

📍 地址:新界元朗錦田水尾村230號

方法1|錦上路站轉601B小巴

乘搭港鐵屯馬綫去錦上路站D出口,前往公共運輸交匯處,再轉乘601B專線小巴,於水頭村鐵橋後、錦田鄉村俱樂部門口附近下車。

方法2|元朗市搭601小巴

亦可以喺元朗市鳳琴街體育館附近乘搭601專線小巴前往。錦田鄉村俱樂部官網亦列明,601/特別線可以直達場地門口。

方法3|錦上路站搭的士

由錦上路站搭的士前往,車程約5至10分鐘,參考車費約$30至$35,如果三、四個人同行都幾方便。

方法4|自駕

場內設大型私家車停車場,官網列明不設預留。最新花海資料亦指自駕人士可免費泊車,不過假日人多,建議早啲去。

錦田鄉村俱樂部|出發前必睇

🎟️ 散客入場:小家庭式參觀免費
🍱 自攜食物野餐:$30/位,大小同價
💵 付款方式:全場只收現金
🎡 遊樂設施:主要逢星期六、日及公眾假期正常開放
🚗 停車場:設大型私家車停車場,不設預留
📅 假日散客:不設預約,即場安排

錦田花海花期幾時完?

最新資料指,今期波斯菊及百日菊花海預計可以維持至2026年11月底至12月初,不過花況始終受天氣、風雨同自然生長影響。

<p