Q-pot CAFE同「百變小櫻」crossover嘅甜品已經喺表參道總店登場啦！百變小櫻迷去開日本記得唔好錯過！

以甜品元素為設計理念嘅日本飾品品牌Q-pot，紀念「百變小櫻」動畫播出25週年，推出「小櫻」飾品外，旗下嘅「Q-pot CAFE」宣布喺小櫻生日（4/1）當日，展開期間限定嘅聯乘！

唔單止將小櫻嘅鑰匙、卡牌，服裝配件等等融入咗甜品造型當中，打造出又粉又夢幻嘅菜式，Cafe亦喺3月16日起開放，可以喺官網預約訂座！

Q-pot精心製作咗「封印之書」餅乾，仲可以打開書本！蛋糕上嘅士多啤梨、忌廉即刻令人眼前一亮！蛋糕仲有白桃慕斯同朱古力醬。搭配紅色嘅「封印之鑰」餅乾同櫻花馬卡龍，仲係限定菜式嚟㗎！

後期嘅限定菜式就係「魔法心之鎖」慕斯蛋糕！層層交疊嘅心形士多啤梨果凍、士多啤梨慕斯同牛奶慕斯，中間仲有匙孔，可以用星之鑰來解除封印！蛋糕內有海綿蛋糕、朱古力波！同樣撘配粉色「星之鑰」餅乾同櫻花馬卡龍。

鹹甜點都有嘅下午茶套餐，集合咗蜂蜜奶油「基路仔」厚鬆餅、有著「小櫻」羽毛裝飾嘅櫻花口味Verrine、知世藍莓慕斯蛋糕、櫻花馬卡龍，同夾著火腿、生菜、雞蛋嘅牛角包三明治、忌廉海蜆濃湯以及法式凍派。

以小櫻戰鬥服為原型製作嘅新地杯戚風蛋糕，有士多啤梨、覆盆子、白桃口味！食完仲可以帶隻杯返屋企！

飲品有粉紅葡萄蘇打、「基路仔」拿鐵奶昔、混入八重櫻嘅獨家櫻花風味茶！

凡消費任何一道食物（不包括飲品），皆可獲得一款小櫻收藏卡特典，一共8款，隨機贈送，送完為止！

CAFE仲有其他周邊可以選購，包括「小櫻玻璃杯」，「鐵盒系列」餅乾、茶葉、水果軟糖、心形棉花糖、三盆糖，喺官方線上店有售。

《百變小櫻》×Q-pot CAFE
地點： Q-pot CAFE表參道總店
時間： 2023/4/1～2023/5/10
活動前期： 2023/4/1～4/20
活動後期： 2023/4/21～5/10
營業時間： 12:00-20:00（20:00停止營業）

*以上資訊只供參考，如有任何變化或更改均以現場情況或商戶決定為準*