
泰國旅遊禮儀|13個港人最易犯錯誤!踩泰銖、國歌、摸頭都中伏
📲 加入WhatsApp Channel「OpenHolidays 飛常著數」,快人一步收到泰國平機票、酒店快閃、Klook/KKday優惠碼及開搶提醒!👉 https://bit.ly/ohotarticle
去泰國旅行,識講Sawadee原來仲未夠!有啲香港人平時好自然嘅動作,例如銀仔跌地用腳踩住、坐BTS翹腳、順手摸小朋友個頭,去到泰國都可能變成失禮行為。
今次《旅行必收科》唔講「唔好爬佛像」呢啲太common sense嘅嘢,而係整理13個香港旅客真係有機會無意中犯嘅泰國禮儀,出發前讀定就唔使去到先中伏。
1|泰銖跌地,千祈唔好用腳踩
泰國貨幣印有王室肖像,而泰國文化亦視腳為較低嘅身體部位。如果銀紙吹走或者硬幣碌走,唔好下意識用腳踩住,最穩陣係直接用手執返。
2|每日08:00、18:00聽到國歌要停低
泰國國歌每日早上8時及下午6時會喺部分政府及公共場所播放。泰國政府旅遊指引列明,聽到國歌時應停低企直,以示尊重。
3|戲院播Royal Anthem,留意現場做法
泰國文化部指引提到,戲院或表演場所播放Royal Anthem時,應以尊重態度對待。香港旅客第一次去泰國戲院,最好先留意現場觀眾做法,避免完全唔知發生咩事。
4|王室唔好亂惡搞、亂開玩笑
泰國官方文化指引將國家、宗教及君主制度列為應尊重的重要制度。旅行期間最安全做法係避免用侮辱、惡搞或輕佻方式評論王室及相關象徵。
5|女性避免直接觸碰僧侶
呢個唔止入寺廟先要注意。搭BTS、坐船、排隊或者遞物件時,女性都應避免直接身體接觸僧侶。
6|搭BTS/巴士見到僧侶,要留意讓座
泰國官方公共交通指引將僧侶、沙彌、修女、長者、兒童等列為應讓座對象。香港人通常只會留意老人家或孕婦,所以呢點真係幾易忽略。
7|搭BTS唔好翹腳翹到鞋底向住人
泰國官方交通指引特別提醒,乘搭BTS等公共交通工具時唔應該翹腳,以免隻腳掂到企喺附近嘅乘客;加上泰國文化本身亦忌用腳指人。
8|坐低唔好將腳板指住人、僧侶或佛像
去按摩店、Cafe、寺廟或者坐地下時,香港人好容易自然伸直對腳。但泰國文化視腳為較低部位,用腳指住人或重要物件會被視為失禮。
9|唔好跨過坐喺地下嘅人
夜市、車站或者活動場合有人坐地下時,唔好貪方便直接跨過對方。泰國文化指引亦提醒唔應跨過人、食物或者書本。
10|見小朋友可愛,都唔好順手摸頭
香港人見到小朋友或者熟朋友,有時會自然拍拍頭,但泰國文化將頭部視為重要部位。唔熟嘅人最好唔好隨便掂對方個頭。
11|唔好將嘢由人哋頭頂上面遞過去
例如餐廳張枱好迫,順手將電話、袋或者食物由朋友頭頂傳過去,喺香港可能完全冇人理,但泰國官方文化指引特別提醒應避免咁做。
12|婚禮、生日、探病唔好一身黑
香港人著黑衫好平常,但泰國文化部指引提到,婚禮、生日、探病等吉祥或特定場合避免穿全黑。普通旅行街頭穿黑色當然唔等於有問題,重點係場合。
13|同泰國長輩食飯,唔好自己第一個開餐
泰國文化重視長輩。官方文化指引提到,聚餐時會先尊重長輩,通常等長輩開始後再食。如果係同泰國朋友屋企人食飯,呢個位尤其值得留意。
Bonus|兩個唔算禁忌,但幾有用嘅冷知識
泰式食飯通常係匙羹+叉
泰國人常見食法係匙羹配叉,叉主要用嚟將食物推落匙羹,唔一定好似西餐咁主要用叉直接食。
Wai唔係見到所有人都要瘋狂做
雙手合十嘅Wai可以用嚟問候、道謝或道歉,亦有尊重長輩或較高身份人士嘅意思。旅客唔需要見到每一個人都誇張地Wai,簡單微笑及禮貌回應已經可以。
最易記嘅6句
💰 錢跌地:用手執,唔好踩
🇹🇭 08:00/18:00:聽到國歌停一停
🙏 僧侶:女性避免直接接觸
🦶 對腳:唔好指人、唔好跨人
👤 個頭:唔熟唔好掂
👑 王室:保持尊重,唔好惡搞
官方參考:
Thailand.go.th|Things you should know before traveling to Thailand
Thailand.go.th|Do's and Don'ts in Thailand
Thailand.go.th|Bangkok public transport guide
*文化禮儀會因場合、地區及個人而有差異,以上按泰國政府文化及旅遊指引整理,重點係尊重當地習俗,唔代表每項都屬法律禁令。
加入OpenHolidays飛常著數
準備去泰國?加入WhatsApp Channel「OpenHolidays 飛常著數」,快人一步收到曼谷、清邁、布吉平機票、酒店快閃同Klook/KKday泰國優惠碼;優惠碼只喺Channel公布!


