fbpx

【網絡熱話】新海誠新作《鈴芽戶締》今年內上映!首個預告片+海報公佈!

4 月 14, 2022 | 香港, 日本, 熱話

☉ 瀏覽次數 : 1285

繼《你的名字》同《天氣之子》之後,新海誠三年後又有新作《鈴芽戶締(すずめの戸締まり)》(又譯《鈴芽的門鎖》)!官方近日公佈咗首個預告片同海報,預告將會喺2022年11月11日喺日本上映,其他地區就有待日後公佈。

故事以日本各地嘅廢墟為背景,17歲女主角鈴芽(すずめ)要將災害源頭嘅「門」關上,串聯過去、現在同未來。

居住喺九州嘅鈴芽某日遇到一位正尋找「門」嘅少年,於是結伴同行,共同尋找「門」。後來佢哋喺山中廢墟發現了一扇破舊嘅門,門似乎有種魔力吸引鈴芽打開,鈴芽向門伸出手。日本各地嘅「門」亦都打開,災難不停從門嘅另一邊蜂擁而至,鈴芽必須將門一一關閉。喺鈴芽關閉「門」的旅途中,觀眾都可以一齊飽覽日本各地嘅美景。




新海誠表示呢部將係一部「非傳統嘅動作動畫電影」。佢嘅舊作如《你的名字》同《天氣之子》都有穿越時空、科幻等元素,《鈴芽戶締》睇預告片就感覺到當中嘅科幻成份。

新海誠指《鈴芽戶締》係前年疫情期間喺家中嘅創作,望向街外,見到疫情爆發後,人來人往嘅日本都市都好空曠。寂寞嘅風景同空蕩蕩嘅街頭,就好似未來一樣。

動畫嘅場景建立喺廢墟之上,係因為「人們喺開墾新地時會拜神、舉辦盛大儀式,但離去時就咩都唔做,只留下蕭條景象。」少女「鈴芽」就係咁喺佢筆下誕生,以佢嘅視角探訪日本各地廢墟,希望為落寞嘅地點劃上圓滿。 新海誠又表示,隨住鈴芽四出「關門」,觀眾亦因此得以周遊日本各地,「希望大家睇完,可以重拾笑容」。

《鈴芽戶締》由新海擔任原作、導演以及劇本,角色設計部分由《天氣之子》、《你的名字》嘅田中將賀、土屋堅一為作畫監督、美術監督亦係丹治匠,動畫製作則係由 STORY inc. 負責。

配音陣容方面,上白石萌音曾為《你的名字》主角宮水三葉配音,而森七菜則為《天氣之子》女主角天野陽菜配音。兩位都係《鈴芽戶締》嘅配音成員!

*以上資訊只供參考,如有任何變化或更改均以現場情況或商戶決定為準*

Klook.com
X