買咗旅遊保險都冇得 Claim？4 大常見中伏位＋黃金教學
去旅行最怕遇到突發狀況，好多人都會買份旅遊保險求個安心。但係到真係出事要搞旅遊保險索償嗰陣，先發現「呢樣唔包，嗰樣唔賠」，甚至覺得買保險根本係呃錢？
其實好多時係因為大家無睇清楚條款，踩中咗隱藏嘅魔鬼細節！為大家拆解 4 個買旅遊保險最常見嘅迷思同中伏位，教你點樣真正保障自己！
旅遊保險其實保啲咩？
首先要知道，旅遊保唔係乜都包，買之前一定要睇清楚保障範圍同賠償上限。一般嚟講，保障主要分 6 大類：
-
人身醫療：包括生病、意外、醫療費同埋緊急救援。
-
財物證件：行李、財物或者證件遺失同被盜。
-
行程突變：取消旅程、提早返港或者航班延誤。
-
個人責任：唔小心整親人或者整爛人哋財物。
-
自駕保障：租車期間嘅墊底費保障。
-
24hr 支援：醫療轉送、法律支援同埋住院按金。
4 大常見旅遊保險中伏位
迷思一：唔見電話實會賠足原價？
-
真相：好多保單都有「單一物品上限」，常見通常只係賠約 $2,000 至 $3,000。賠償時仲可能要扣折舊，甚至有啲保單會列明唔保手提電話或者攝影器材！
-
自救做法：買之前睇清楚個人財物上限同單一物品上限，確認手機同相機有無列入保單入面。
迷思二：餐廳漏低個袋，報失就有得賠？
-
真相：好多保單都唔保「疏忽照顧」。如果喺無人看管嘅情況下遺失財物，保險公司好大機會拒補。如果係被偷，通常要有當地報案紀錄。
-
自救做法：貴重物品一定要跟身。萬一被盜，要盡快報警並喺 24 小時內拎返報案紙，仲要保留購買單據或者相片證明。
迷思三：買最高級別，玩咩都有得保？
-
真相：未必！投保前已經有嘅病症（例如長期病、哮喘、心臟病），未必受保。而滑雪、潛水、跳傘等高危活動，可能會有高度、深度或者活動限制。另外，部分保單對 65 或 70 歲以上長者、18 歲以下小童嘅醫療或人身意外保障額會降低甚至減半。
-
自救做法：如果帶父母、小朋友，或者會玩滑雪潛水，買前一定要睇「不保事項」同埋留意「保障額是否減半」。
迷思四：飛機 Delay 就可以即刻 Claim 津貼？
-
真相：好多保單要求 delay 滿指定時數先會賠，常見係約 5 至 6 小時起跳。而且延誤原因都好重要，部分航空公司內部調動或機件問題未必一定包。如果臨飛先買保險，未必保到「取消行程」。
-
自救做法：買完機票酒店就盡早買旅遊保！因為取消行程保障通常由投保一刻開始，早買先有用。
出發前 3 秒 ➕ 出事後 3 步黃金自救法
唔想有事嗰陣手忙腳亂，記得跟住以下 Checklist 做：
出發前 3 秒 Checklist：
-
Cap 低保單資料：記低保單號碼同 24 小時緊急熱線。
-
Send 畀同行 / 家人：萬一你無意識，都有人代你求救。
-
帶高額信用卡：外地醫療好多時要先墊支後索償。
黃金索償 3 部曲：
-
報案 / 求醫：唔見嘢要盡快報警；病咗要睇當地註冊醫生。
-
Keep 正本單據：醫療費、藥費、交通、住宿、delay 開支全部要留單（因為無單＝好難 claim）。
-
留意申請死線：返港後一般要於 21 至 30 日內遞交索償。
唔想有起事上嚟手忙腳亂，或者白交保費？即刻 SAVE 低呢個 Post，下次買保險同出發前攞出嚟action啦！
