東華三院「文武辦館」開幕！毗鄰上環文武廟，助基層以接近成本價購買日用品及糧油雜貨

東華三院全新服務單位「文武辦館」，已經喺2025年3月25日正式開幕喇！作為歷史悠久嘅慈善機構，東華今次嘅創新項目，除咗好似傳統辦館咁供應糧油雜貨、懷舊零食、節令食品、精品咖啡以及水果等等嘅多元化商品，亦希望連結到唔同世代同社群，推動「以商助善」嘅可持續發展模式。

「文武辦館」特意選址上環，毗鄰法定古蹟文武廟群、「文武別苑」以及文武廟小店呢啲文化空間，形成「廟宇一市集一社區」三位一體嘅活化網絡，其實係希望將中國傳統文化延伸去香港市民嘅日常生活，不論係廟宇本身嘅服務使用者，抑或其他當區市民，一樣可以受惠。

為咗貼心支援唔同基層嘅社群需要，一經註冊社工轉介，所有低收入及綜援家庭、長者、傷殘人士、新移民以及少數族裔，都可以用接近「成本」嘅優惠價格買嘢，減輕生活負擔。

喺開幕典禮上，東華三院鄧明慧主席表示：「東華三院今年踏入155周年，自1870年成立以來與香港共同成長，除咗重視保育華人嘅傳統文化，同時一直支持新文化發展。為咗履行東華三院嘅使命同服務承諾，我哋積極推動創新以及可持續發展嘅優質服務，並且建立年輕活力嘅機構形象。」

文武辦館
開放時間：上午8:30 - 下午8:30（星期一至日）
地址：上環皇后大道西88號東慶閣3號地舖
查詢：2571 0966