fbpx

【澳門】每日新鮮製造 純天然洪馨椰子雪糕

4 月 8, 2021 | 澳門, 美食

☉ 瀏覽次數 : 589

講起澳門美食,好多人都會諗起葡撻,原來除咗葡撻之外,椰子雪糕亦係澳門嘅美食代表!今次小編會為大家介紹一個澳門本土品牌「洪馨椰子」,呢個老字號喺清朝時代已經開店,有超過一百四十多年歷史,四代經營,保留咗正宗澳門獨有椰子雪糕嘅味道。

洪馨作為百年椰子世家,佢哋比一般人對椰子有更深嘅認識,同時亦識得用最適合嘅手法去處理椰子,有非常豐富嘅經驗!店主表示店鋪嘅椰子食品一律採用來自馬來西亞嘅椰子,呢款椰子唔會太大個,但椰肉比一般椰子厚,而且帶有濃濃椰香味,可以唔需要另外加糖、調味,都可以製成好好味嘅椰子美食。

當中嘅招牌椰子雪糕更加係必食推介,由新鮮椰漿同其他材料製作而成,啖啖都係椰子嘅原汁原味,好食到停唔到口!雪糕由人手製成,店主每日清早就會開始製作雪糕,直至中午先可以完成幾十杯,可見每杯雪糕都係用心製作,非常難得!




洪馨嘅產品之所以有口啤,全因為由選料到製作過程都非常嚴謹,佢哋保留咗傳統手造方式,打造獨有嘅綿滑細膩口感!味道方面,雪糕唔會好甜,反而係帶有滿滿嘅椰子香味,畀人一種清新嘅感覺。由於製作過程繁複,雪糕每日只製作兩次,賣完即止!

依家市面上好多雪糕都係用機器製成,或者以香料取代果肉,所以呢種正宗傳統嘅雪糕真係買少見少。下次去澳門時,記得早少少去排隊,睇下有無機會食到啦!

洪馨椰子
地址:新馬路果欄街14號地下

*以上資訊只供參考,如有任何變化或更改均以現場情況或商戶決定為準*

Klook.com
X