道地綠地野營祭2025強勢回歸！草地Chill住聽吳林峰Pandora Busking、炮製古法野炊美食、DIY露營設備，專車接送再送別注禮品包

秋風起，係咪好想搵個地方出走叉叉電呢？「道地綠地野營祭」今年強勢回歸，準備好同朋友、家人一齊逃離城市，去元朗萬呎大草地上面盡情放空未？有時露營都想舒舒服服唔使帶咁多裝備，呢個活動幫你準備晒音樂、美食、手作同玩樂，仲有車接送，無論你係露營新手定高手，帶個人去就可以Chill住咁玩一個下午！

即睇活動亮點：
草地聽Live
大會請嚟人氣歌手吳林峰、樂隊Pandora同City Echo，喺青草地同山野之間Busking，令參加者可以喺微風吹拂下，攤喺草地上面聽住悠揚音樂，感受無拘無束嘅療癒氛圍。

原始野炊盛宴
去Camp成日自己煮或者BBQ，不如跟野外料理達人玩真正嘅「野炊」！你可以親身試到用古法炮製嘅煙燻三文魚、落手落腳整土法火窯雞，甚至DIY炭爐Pizza！香味隔住個mon都聞到，即整即食，呢種風味市區一定試唔到！

自製獨一無二露營裝備
露營用品一式一樣好悶？呢度有多個手作工作坊，由手作專家親手教你DIY屬於自己嘅露營裝備，不論小木椅手機座、彩繪露營燈以及爬山繩露營椅，全部都實用有質感，仲好有同紀念價值。

巨型木製玩樂區
唔好以為淨係得大人玩，呢度特設「綠地玩樂區」，有巨大版嘅木製遊戲同勁多露營主題嘅互動Game，絕對係親子放電嘅最佳選擇。

提提你，今次活動仲同國家地理頻道 National Geographic 搞聯乘，只要買$480嘅指定VIP飛，就會送 NAT GEO RUN HK 2025 x 道地嘅別注版掛飾及側肩包，又或者別注版T-Shirt，勁有收藏價值！

道地綠地野營祭2025
日期：10月18日 及 19日 (星期六及日)
時間：上午11時至下午6時
地點：元朗山林里農莊
門票價格：成人套票$160、小童套票$50、成人綠地套票$200、NAT GEO RUN HK 2025 VIP套票$480
購票網站：Klook https://bit.ly/GreenVibersCamp25
交通：大會提供共4條路線的免費穿梭巴士，由山林里往返錦上路、鑽石山站、大學站、金鐘站或紅磡站
詳情： https://www.facebook.com/GreenHolidays