【嗇色園黃大仙2025靈蛇獻瑞迎新春】拜財神、祈太歲、浪漫元宵花燈攻略
嗇色園黃大仙祠2025年靈蛇獻瑞迎新春來襲！新春必做 : 太歲元辰殿拜太歲、財神宮貼金箔迎財運、正月十五元宵祈求好姻緣。如果你都想感受濃厚的節日氣氛，就要快啲計劃新春行程，開運迎接蛇年啦！
【黃大仙靈蛇獻瑞新春活動攻略】
今年係蛇年，新一年想要平安順利、財運亨通，又想要天賜良緣，首推嗇色園黃大仙祠！快啲睇下精彩活動亮點，計劃好新春行大運啦！
1. 求財運｜財神宮
有邊個唔想財運亨通？想新一年賺到盤滿缽滿，黃大仙祠嘅財神宮就啱哂你！你有冇諗過可以親手為財神貼金箔，祈願財運滾滾來？請領金箔仲可以獲贈多款好意頭嘅財神宮福物，財源廣進就係咁簡單！得咗！
請領金箔送福物：
- 捐款港幣$100請領1片金箔，送「琉璃如意擺設（小）」＋「招財琉璃元寶」。
- 捐港幣$500請領5片金箔套裝，可以得到「琉璃如意擺設（大）」、「五色琉璃元寶」、「五方來財錢袋」同「財神金卡」。
驚到時好多人貼金箔，可以點算？唔使擔心，可以由嗇色園嘅道長代貼㗎！
想添多啲財運：
- 捐港幣$388可請領「風生水起」招財風車擺件。
- 捐港幣$3000則可請領「金財神」一尊（數量有限，換完即止）。
財神宮開放時間：
- 年廿九(1月28日) : 早上8點至下午4點半
- 初一(1月29日)：早上8點至晚上9點
- 初二至十四(1月30日至2月11日)：早上8點至晚上6點
- 正月十五元宵節(2月12日)：早上8點至晚上9點
2. 拜太歲｜太歲元辰殿
新春拜太歲係好多善信嘅指定祈福儀式。今年蛇年，屬蛇、豬、虎、猴嘅朋友就要特別留意啦，因為你哋犯太歲！唔使驚，正月期間憑身份證明文件可以免費入太歲元辰殿祈福，祈求來年平安順遂。
拜太歲流程：
太歲元辰殿會提供三支檀香，善信可依次參拜：
- 斗姥元君
- 值年太歲吳遂大將軍
- 本命太歲
太歲元辰殿開放時間：
- 年廿九及初一 (1月28日至1月29日) 暫停開放
- 初二（1月30日）中午12點至下午5點
- 初三至十五（1月31日至2月12日）上午8點至下午5點
3. 浪漫元宵｜花燈＋拜月老
- 正月十五係中國情人節，即係元宵節。當晚，黃大仙祠會延長開放到夜晚9點，園內仲會擺滿花燈，每一個都係浪漫打卡位，到時記得影多啲靚相啦！
元宵節活動亮點：
- 拜月老求姻緣：善信只需捐港幣$20，即可請領「月老手繩」，仲送祈願卡一張，將心願掛上桃花樹，祈求甜蜜幸福好姻緣！（「月老手繩」數量有限，派完即止。）
- 古風燈籠：下午6點後入園，善信可獲贈古風燈籠一個（數量有限，派完即止）。
- 打卡影相：園內特設古風背景，建議着埋華服入園，拍出獨特新春美照！
元宵節開放時間：
- 正月十五(2月12日)：上午7:30至晚上9:00，最後入園時間為晚上8點，記得提早安排！
蛇年迎新春，嗇色園黃大仙祠為你準備咗精彩嘅新春活動：財神宮貼金祈財運、太歲元辰殿求平安、元宵節浪漫花燈打卡，仲可以拜月老求姻緣！無論係一家大細定同朋友情侶同行，都保證滿載而歸。即刻計劃行程，一齊嚟感受節日喜氣啦！
🗓️ 黃大仙祠開放時間：
- 年廿九(1月28日) 早上7點半至下午4點半、晚上9點至凌晨12點
- 初一(1月29日) 凌晨12點至晚上9點（*最後入園時間晚上8點）
- 初二至十四(1月30日至2月11日) 早上7點半至下午6點
- 正月十五元宵節(2月12日) 早上7點半至晚上9點（*最後入園時間晚上8點）
