隨著時代變遷，好多兒時零食都已經逐漸消失！

早前有網友喺Facebook「90年代回憶 (新版)」群組發帖文分享兒時茶點，

唔知又有冇令你重拾童年回憶呢？

第 10 名：檸檬夾心餅

有網民表示：「檸檬夾心餅，搣開舐晒啲檸檬，唔食塊餅」

呢個簡直係講出大多數人嘅心聲呀！

食每一塊餅都真係為咗檸檬夾心㗎咋～

第 9 名：字母餅

除咗返學之外，以前仲可以食住學英文㗎！

以英文字母為造型嘅字母餅，會唔會因而令你產生對學習嘅興趣呢？

第 8 名：動物餅

動物餅由細到大都咁鍾意食！

餅乾以唔同動物為造型，真係好可愛！

以前每一塊放入口之前，都會睇吓自己手上嘅係咩動物～

只要食齊所有動物，就會好滿足！

第 7 名：魚仔餅

魚仔餅一向都咁受歡迎，特別係紫菜味！

逐粒逐粒慢慢食又得，一次過倒哂落口食都得！

網民亦提到「魚仔餅，好食」，咁你又有冇同感呢？

第 6 名：麥芽酥餅

麥芽酥餅都好好食！

口感香脆，上面仲帶點麥芽糖，夠哂開胃～

仲有網民回憶起以前會「偷偷地拎番屋企響張床跳住食」～ 哈！

第 5 名：水泡餅

80後對於呢款餅真係兩極化！

有人好憎食，表示：「我反而諗起最憎嘅水泡餅」、「麈世間，最難食之餅，莫過於此」

但亦有人表示好鍾意食，提到：「水泡餅要浸牛奶食…牛奶係指熱水加煉奶」

食法又幾特別喎～不過相信呢兩類人仲需要一段時間爭辯先會有結論……

第 4 名：馬利餅

馬利餅香香甜甜，就咁食都好易入口～

不過有網民就分享獨特食法：「浸半塊落杯清水再食，超正」

唔知呢種食法有幾多人試過呢？

第 3 名：手指餅

手指餅，又叫做煙仔餅～

相信小時候嘅你，都一定試過拎住手指餅扮食煙～

網民仲提到：「賣飛佛～」、「貴嘢」

吸吓、啜吓又吹吓～簡簡單單嘅零食已經可以玩好耐！

第 2 名：花占餅

花占餅，又叫做肚臍餅～

仲記得幼稚園每次見到有花占餅作為茶點，都會好興奮！

有網民表示：「肚臍餅淨係食上面彩色嗰粒」、「以前淨係食過花，細個嗰陣就係貪佢夠甜！」、「五顏六色真係幾靚 我會食咗餅先 粒糖就慢慢嘆」

上面粒糖真係百吃不厭呀！

第 1 名：椒鹽南乳餅

呢款餅得到大部分網民嘅好評！

「椒鹽南乳餅次次食開都停唔到口，一塊接一塊。」、「南乳餅係愈食愈多，之後食到停唔到的邪惡食物之一」、「南乳餅世一」

餅乾仲有唔同形狀～

心型、菱形、圓形、正方形，總有一款係你偏愛！

來源：Facebook「90年代回憶 (新版)」群組、網絡圖片

*以上資訊只供參考，如有任何變化或更改均以現場情況或商戶決定為準*