2022年5月5日為二十四節氣中嘅立夏，春季已過，步入炎熱嘅夏季。天氣開始熱，等小編同大家講吓禁忌同習俗，再推介一啲時令湯水俾大家，等大家健康開心迎接夏天來臨。

多吃時令蔬果

夏天時節飲食可以以「酸」為主，自家醃酸薑，暖胃又唔上火，仲可以食多啲時令蔬果，例如蘋果、檸檬、番茄、苦瓜、青瓜等等。盡量以清淡嘅口味、少鹽、少油烹調方式為主。

立夏蛋

立夏吃了蛋，熱天不疰夏。天氣炎熱令唔少人胃口減退，稱之為「疰夏」。有民間傳說，女媧娘娘指點百姓，食煮熟嘅蛋，可以解「疰夏」，因此後來好多人都會喺立夏食蛋。

要瞓「子午覺」

進入「立夏」後，天光得早、日落得遲，晝長夜短，適當嘅「子午覺」就好重要，子時指晚上嘅11點至凌晨1點，午時指中午嘅11點至1點。可以遲少少瞓，不過就要早起，做好防曬，多多吸收太陽。

要注意天氣變熱帶嚟嘅影響，容易有較多「濕氣」喺體內，容易引發皮膚疾病、香港腳等皮膚病，保持乾燥、乾爽嘅衛生習慣，能有效預防。雖然夏天嚟到，但都要注意日夜溫差。

「立夏」時天氣燥熱，要調整自己嘅心情，避免抑鬱暴怒，保持安靜、心情愉快，心情煩悶時，要適時紓壓。

立夏禁忌：

唔可以坐門檻：
相傳立夏係門神生日，因此唔好坐喺門檻上，以免阻擋門神出入，擋住門神前途容易黑暗。

唔好喺正門着鞋：
喺正門口着鞋容易激嬲門神，因此建議喺門口旁邊着鞋避開門神。

忌吃過補食材
立夏不宜食得太補，食得太補容易導致上火，喉嚨乾，胸悶，氣血循環變差，食退火食材較好。

忌躁動衝動：
夏天炎熱容易躁動衝動，因此不宜講話太直接，也唔可以衝動投資以免投資失利。

立夏湯水食譜

蓮藕紅頭章魚豬踭湯

適合所有體質，陰虛，濕熱。益氣補血，養胃。

材料：蓮藕1斤半、太子參1兩、豬踭1隻、紅豆1兩、紅棗4粒、陳皮1小塊、乾章魚1隻、生薑2片、油鹽適量

*以上資訊只供參考，如有任何變化或更改均以現場情況或商戶決定為準*