【香港】理大擬紅隧收費廣場上建綠化平台！7個主題區！連接海旁！

5 月 20, 2022 | 紅磡 / 土瓜灣 / 九龍城, 香港, 熱話

理大計劃喺紅磡隧道收費廣場上興建建三層高綠化平台，佔地約三萬平方米，有7個主題區，設步行徑、露天劇場、彈床公園、綜合體育設施等等。並連接紅磡站、尖東、尖沙咀海濱長廊、Hotel ICON等地方。

擬建嘅綠化平台分為三個樓層，地面有兩個室內巴士站，平台層同中層則係室外綠化空間。室外綠化空間將會種植唔少樹木，希望為市民提供空氣清新嘅空間。平台層亦設向海旁伸延嘅多層公眾觀景台，觀景台設有零售同飲食設施。中央亦會有橢圓形有蓋多用途空間，可作展覽等用途。理大亦建議喺綠化平台增設多項戶外設施俾公眾使用，例如露天劇場、彈床公園等。

呢層嘅行人通道亦會接駁現有同新建嘅行人天橋，直接通往理大、紅館、紅磡站等地方。

理大喺提交區議會嘅文件稱，紅磡區人多車多，空氣質素欠佳，行人天橋使用率亦超出負荷。缺乏大型綠化等文康設施，港鐵東鐵線過海段通車後，情況更會加劇，因此希望綠化平台可以紓緩紅隧收費廣場車流密集產生嘅空氣同噪音等環境污染，同因收費廣場造成地區分割往來不便等等嘅問題。項目去年亦獲賽馬會慈善信託基金撥款後，聘請咗工程顧問就項目發展研究。