采悅軒推出咗全新菜單，精選咗十道東涌世茂喜來登酒店中菜行政總廚鍾志強鍾師傅嘅巧手手工粵菜，當中仲包括幾近失傳嘅傳統菜式！

呢款「鍾師傅十式」菜單，有三式「采悅小碟」（$128），係三款涼菜，包括「池香拌稀瓜」，西瓜煎至表面乾身，面頭點綴梅香馬友鹹魚！「煙熏夜明珠」則係以低溫65度慢煮嘅白鴿蛋，白鴿蛋坊間十分少見！鴿蛋煮成流心，配上黑魚子。「晶凝花厘凍」係水晶花膠凍，以花膠熬成濃湯再冷藏凝結成凍。

必食「招牌妙齡乳鴿」（$118），皮脆肉嫩，仲超級多汁。師傅以秘製方法，製作曾每日賣過萬隻嘅風味乳鴿，係食客到訪采悅軒嘅必點菜式！

仲有兩款滋潤燉湯。「松茸菌清燉響螺」（$398），清甜又養生，湯水清澈得嚟冇油脂，但飲落卻有食材嘅豐富層次！仲有師傅特別設計嘅「羊肚菌清燉和牛」（$398）。以日本和牛撘配羊肚菌，結合中日食材。

「花雕蛋白蒸水晶蝦伴燒雲腿」（$368）係升級版嘅「玻璃明蝦球」。肥美肉厚嘅水晶蝦，配搭上湯煮成嘅花雕蛋白。仲有幾乎失傳嘅傳統菜式燒雲腿，香氣超濃郁，特別甘香！雲腿製作複雜，先用糖醃製五天，再用麵包糠炸香表面。

「百花釀蟹鉗」（$268），用上新鮮即拆生蟹鉗，即叫即拆，花時間又花功夫。選用肥美肉蟹，再混合蝦膠釀製。

師傅另一招牌「太子琵琶鴨」（$288）。嚴選600至800克重幼鴨，確保鴨肉新鮮幼嫩。精準控制爐火同時間，喺短時間內將太子鴨燒至外脆內嫩，香而不羶。

平凡嘅桂花糕亦特製成「棋子桂花卷」（$80）。好似宮廷點心咁，外型精緻又層次分明。

仲有一款名為「貴妃香」（$90）嘅點心。外型似荔枝咁嘅樣，內藏荔枝果肉同流沙奶黃。

采悅軒
地址：香港新界大嶼山東涌怡東路9號香港東涌世茂喜來登酒店2樓

*以上資訊只供參考，如有任何變化或更改均以現場情況或商戶決定為準*