位於屯門曾咀嘅T·PARK源·區係一所獨一無二、自給自足、結合先進科技於休閒、教育同自然生態項目嘅綜合設施。2016年開幕以後超過28萬人次，將近開幕6週年，由即日起每節導賞服務人數放寬至30人！5月26日起，仲重新開放團體預約申請。

T．PARK環境寧靜，仲有富有設計感嘅建築，最適合一日遊打卡！呢到分為十個景點，每個景點都有唔同類型嘅設施可以參觀，有得玩仲可以認識可持續發展！

源·林

超過9,800平方米嘅戶外園林花園，包括噴泉花園、悠閒花園、禪園、濕地花園同戶外足浴池。

源·館

公眾展覽廳，到訪人士可以喺呢到認識污泥處理嘅過程，仲有一系列創新嘅互動展品。

源·景

位於行政大樓頂層，可以一眼睇哂四周景致，仲可以參觀一系列具環保意念嘅傢具同升級回收陳列品。

源·湖

係一個重建嘅雀鳥保護區，有小鸊鷉、翠鳥、苦惡鳥、蜻蜓同一啲兩棲類動物出沒，喜歡觀賞自然生物嘅朋友必去！

源·臺
天台花園，位於環境教育中心嘅天台，喺戶外環境下可以鳥瞰附近景色，仲有一望無際嘅無敵海景！

源·廊
到訪人士可以喺唔影響廠房嘅運作下，透過源·廊嘅大型玻璃窗睇到設施嘅營運情況。仲有一系列1:1嘅污泥夾模型。

源·茶
如果玩到攰，不妨嚟到呢個自助茶館抖抖。仲有簡單輕食提供，引入咗環保桌椅同餐具。場內仲有個自助洗碗區，食客食完嘢記得親手洗返碗！

源·廳
配備先進燈光同影音系統嘅小型電影院，播放T·PARK嘅介紹短片

源·點
除咗有自助茶館，仲有呢個休息區，有環保嘅資訊同自然生態短片，就算休息期間都唔怕悶！

源·泉
透過轉廢為能附設嘅冷暖水療池T．SPA同戶外足浴池，是放鬆身心嘅好地方，焚化過程中產生嘅熱能為設施內嘅水療池水加熱，仲可以喺浸水時望住無敵大海景！但目前因疫情關係，源．泉仍暫停服務。

環保署表示將會舉辦一連串嘅T·PARK 6周年宣傳活動，包括以惜物減廢為主題嘅工作坊！

T．PARK 源．區

逢星期一、星期三至日開放

開放時間：上午10時至下午7時

團體的預約申請

圖及來源：T · PARK

*以上資訊只供參考，如有任何變化或更改均以現場情況或商戶決定為準*