天水圍一直都冇公營街市，近年政府落實將喺天水圍站外對出興建新街市，元朗區議會最近公布咗最新進度同設計構念圖！

新街市將建成喺天福路，三層高仲有架空平台，提供約150個檔位，另外再設有花園、休憩空間等等。仲會有行人天橋連接天水圍站同輕鐵站。

街市嘅一樓同二樓係提供冷氣嘅室內街市，150個檔位，包括咗大、小型攤檔同熟食檔，兩層都設有戶外花園，頂層就有半蓋式花園、休憩處同水耕種植街市攤檔！

文件就提到，街市特別加入咗「地方營造」（place-making）嘅元素，好似提供多個綠化休憩空間，同提供一個多用途空間，可以用作舉辦唔同活動。

元朗區議會預計喺今年年底就會進行首階段嘅遷移同擴闊車道工程，之後就會展開新街市嘅建造工程。為咗減低對附近居民嘅影響，工程會分階段進行，仲會有臨時交通安排，行人同車輛可以繼續使用天福路，公共交通服務亦會維持，預料項目喺2027年完成。

*以上資訊只供參考，如有任何變化或更改均以現場情況或商戶決定為準*