自從內地全面通關之後，唔少朋友都開始周末去深圳一日遊！

但其實近年內地都多咗好多大型購物商場，可以一次過滿足買、食、玩嘅願望！

小編為你集齊12個商場，搭地鐵就去到！

=================

1. 歡樂海岸

歡樂海岸係一個以水為主題嘅大型綜合商場，近年相當受歡迎！

皆因商場有被譽為全球十大必睇展覽之一嘅TeamLab光影展覽，

同埋台灣原創設計展覽「色廊」，想打卡絕對唔可以錯過！

商場仲設有海洋奇夢館、大型戶外音樂噴泉，同埋國際影城等娛樂設施～

購物之餘仲可以帶畀你娛樂，相信玩足一日都唔會覺得悶呀！

INFO.
地址：深圳市南山區白石路8號歡樂海洋
交通：深圳地鐵1號線僑城東站C出口，步行約15分鐘就到

=================

2. 萬象城

如果平時有去深圳嘅朋友，相信對萬象城應該唔會感到陌生！

商場分為三個主題區域，分別有售賣各式各樣商品嘅美學生活區（Mixc Collection）、多國特色餐廳嘅美食區（Mixc Kitchen），

同埋不時會舉辦展覽嘅藝術空間區（Mixc Arts），滿足唔同顧客嘅需要！

INFO.
地址：深圳市南山區科苑南路2888號
交通：深圳地鐵11號線／2號線後海站G出口，步行約10分鐘前往

=================

3. 海岸城購物中心

行哂深圳灣萬象城之後，各位女士記得去埋旁邊嘅海岸城購物中心！

海岸城一共有7層，單係地下嘅超級市場佔地已經有接近4500平方米～

由食品、酒類、家品、母嬰用品等，應有盡有！

至於第2層更加有超過20間國際化妝品品牌同時裝品牌嘅專門店進駐，唔夠仲可以行埋第3層！

至於商場5樓亦有多間餐廳，包括日式壽司、燒烤、火鍋等，行到攰都唔洗驚餓親！

INFO.
地址：深圳市南山區文心五路33號
交通：深圳地鐵11號線或2號線後海站E出口／E2出口

=================

4. 壹方城

講到深圳面積第二大嘅商場，咁一定係壹方城，佔地面積達36萬平方米！

商場有7層高，超過500間商鋪～

除咗售賣時裝、家品、電器、精品同生活雜貨之外，仲有超市同各式各樣嘅餐廳～

值得一提，呢度有被評為全中國最靚嘅「覔書店」！

店內集閱讀、文化創作、咖啡同活動場地於一身～

仲有以過山車速度，利用軌道傳菜嘅「SpaceLab失重餐廳」，

呢個餐飲體驗相信會令你大開眼界！

INFO.
地址：深圳市寶安區創業一路與新湖路交叉口
交通：深圳地鐵1號線寶安中心F出口

=================

5. 壹方天地

壹方天地係深圳最大商場，「壹方城」嘅姊妹商場，佔地60萬平方米！

全個商場分成A至E區，其中包括一條長達1,000米嘅商店街～

商場仲有戲院、溜冰場、室內跳傘場、餐廳、家品店、服飾店等，娛樂性十足！

INFO.
地址：深圳龍華區人民路與景龍建設路交匯處
交通：深圳地鐵4號線龍華站A出口，步行約10分鐘就到

=================

6. 金光華廣場

金光華廣場開幕已經有一段時間，

但近年經過翻新之後，廣場設計更加有格調～

特別係中庭嘅連接廊，設計成為木船嘅形狀，相當有特色！

廣場內亦有唔少國際品牌、美食餐廳進駐，有時間不妨嚟行下！

INFO.
地址：深圳市羅湖區人民南路2028號
交通：深圳地鐵2號線湖貝站

=================

7. 萬象天地

如果你係文青，又點可以唔嚟萬象天地？

商場正門嘅大象 Bubblecoat Elephant ，相當具標誌性！

而商場都有唔少Cafe同文藝商店，散發著濃厚嘅文藝氣息～

難怪吸引咁多文青嚟！

INFO.
地址：深圳市南山區粵海街道深南大道9668號
交通：深圳地鐵1號線高新園站A出口

=================

8. 深業上城

深業上城喺2018年開幕，商場有超過300間商店，劃分為生活體驗街、時尚購物街等～

不過講到最受歡迎嘅一定係「Loft小鎮」，建築以紅色、黃色、橙色、白色作主色，

喺橫跨兩邊建築物嘅天橋上打卡，夠哂型呀！

INFO.
地址：深圳市福田區皇崗路5001號深業上城
交通：深圳地鐵3號線蓮花村站

=================

9. 福田星河 Coco Park

福田星河COCO Park係國內首個情景式公園版休閒購物中心之一，同埋地鐵1號線同3號線嘅購物公園站連接，交通方便。

集合咗休閒、購物、餐飲、娛樂等多種功能，加上二期，有超過400多間國際同國內知名品牌進駐。

佢嘅獨特之處喺有12條折疊式內街、8大自然光中庭，同埋6000平方米嘅下沉式露天廣場，以複合空間嘅形式完美演繹時尚購物。

INFO.
地址：深圳市福田中心區福華三路269號
交通：深圳地鐵1號線購物公園站C出口、3號線購物公園站F、G出口

=================

10. 方大城

方大城樓高4層，但都唔會悶親你！

因為有全深圳第二間華誼兄弟影院，

至於食肆方面，無論係大型餐廳定係打卡Cafe都有，任君選擇！

臨離開記得去埋超市掃貨呀！

INFO.
地址：深圳南山區龍珠4路2號
交通：深圳地鐵7號線龍井站B出口，沿龍珠4路轉乘的士約5分鐘

=================

11. 上塘薈

上塘薈位於地鐵站上蓋，交通方便！

商場一共有4層，其中四成都係食肆，仲有超過200間商店～

包括：上影盛泰國際影城、樂購Express等等。

重點係：商場24小時開放，隨時隨地過嚟都得呀！

INFO.
地址：深圳民塘路521號
交通：深圳地鐵4號線上塘站A/D出口

=================

12. 領展中心城

領展中心城（原稱中心城廣場），商場匯聚多姿多采的餐飲、購物、消閒、娛樂及教育選擇。

毗鄰高鐵福田站及地鐵1號和4號線，地理位置優越，各式知名品牌雲集。

INFO.
地址：深圳市福田區福華一路3號
交通：深圳地鐵1號線、4號線會展中心站B出口
廣深港高速鐵路：福田站11號出口

=================

而家有咗高鐵，返深圳快咗好多～

加上以上商場都係位於深圳地鐵沿線，都好方便！

大家不妨趁周末北上，探索每個商場嘅特色！

圖片來源：網絡

*以上資訊只供參考，如有任何變化或更改均以現場情況或商戶決定為準*