位於大阪市中心嘅Spa world世界大溫泉，

佔地８層，集合溫泉、餐廳、住宿、游泳池、按摩、Spa、健身房、岩盤浴於一身，

仲係位於地鐵御堂筋線動物園站前，可達度相當高！

Photo credit: Instagram (@singerartist_a)

二樓係售票處，同時亦係SpaWorld Hotel入口。

唔好以為附設嘅旅店一定好貴，平均每晚住宿費用只係大約港幣600元，

就可以喺城市內享受溫泉，真係好吸引！

美食街設於三樓，提供超過十間嘅餐廳，

可以食到大阪燒、拉麵、中華美食等！

同層亦設有Spa及按摩設施～

如果想體驗岩盤浴嘅話，

亦可以額外付費享用，有齊世界八國主題特色任你揀！

喺世界大溫泉裡面，客人都係利用手環感應去消費，

而到時精算機上亦可以選擇中文，咁就唔擔心會睇唔明日文啦！

歐洲溫泉區設於四樓，係男女分開嘅「祼湯」區域（即不可穿衣服）。

提供七種風格、近二十個溫泉池，

包括：古羅馬浴池、希臘藥草浴池、亞特蘭蒂斯、西班牙露天浴池等～

而其中卡布里島藍洞嘅溫泉池最令人讚嘆！

溫泉仲有改善消化不良、促進新陳代謝等功效～

不過要留意嘅係，歐洲區只有單月可供女性使用，而雙月就供男性享用。

除咗大人享受溫泉之外，小朋友都可以去 Kiddy Park，

內有波波池、滑梯等，刺激又好玩！

至於亞洲溫泉區設於六樓，裡面分為日本、峇厘島、中國等主題風格，

有齊唔同功效嘅二十個溫泉池。

同歐洲溫泉區相反，單月可供男性使用，而雙月就供女性享用。

其中，伊斯蘭石浴池係以伊斯蘭教清真寺庭院為主題，

用絢麗嘅瓷磚堆砌出阿拉伯風情嘅溫泉空間！

喺新加坡風情區，裡面設有「氧氣浴」、「電氣浴池」、「碳酸浴」、「碳酸水浴池」，

四種溫泉池各有功效，等你可以慢慢體驗！

而源自芬蘭嘅桑拿浴，亦有助紓緩疲勞～

至於喺日本溪流露天浴場，

就提供咗三個溫度嘅溫泉池，滿足唔同人嘅需要～

呢度仲有檜木浴池、健身房、剪髮部，不過都係需要額外收費㗎～

嚟到八樓，係男女共享嘅設施，大家都要著泳衣㗎！

冬季係露天溫泉，而夏季為游泳池，設有多條滑水道、漂流河、水中越野設施等～

充滿娛樂性！

SpaWorld 世界大溫泉
地址：大阪市浪速区惠美須東3-4-24
開放時間：早上10：00至翌日8：45（遊泳池及館內店鋪的營業時間會隨季節而變更）
交通：大阪地鐵御堂筋線、堺筋線於動物園站下車
購票網址：

*以上資訊只供參考，如有任何變化或更改均以現場情況或商戶決定為準*