fbpx

【日本】麵包做嘅燈?!仲有薄餅做嘅掛鐘?!美食控必買創意家品!

5 月 10, 2022 | 日本, 熱話

☉ 瀏覽次數 : 436

愈嚟愈多嘅精品麵包店出現,麵包唔再係早餐咁簡單。今次介紹一個愛麵包愛到將麵包轉化成其他物品嘅日本設計品牌PAMPSHADE!

仔細一睇麵包都喺到發緊光,原來呢啲包都係電燈!

PAMPSHADE創辦人森田優希子,係名副其實嘅麵包迷,不只喜歡食麵包,喺麵包店打過工,睇著賣唔出嘅麵包被大量扔棄覺得好可惜,一直思考有咩方法可以傳遞出麵包外表、香氣、製作方法嘅魅力。




大學畢業後佢從事設計工作,有日突發其想將麵包製成燈,得到麵包店嘅協助,以本來將會廢棄嘅麵包進行試驗,最後成功設計出用真麵包製作嘅麵包燈,成立咗品牌PAMPSHADE。呢個創意令她一舉成名,商品大受歡迎。

PAMPSHADE嘅產品都係用真正嘅麵包造成,主打商品就係麵包燈!款式有長長嘅法包、牛角包、方包、酸種麵包等,還可以特別訂造想要嘅麵包款式。細麵包燈需要電池發電,而大嘅法包則要插電使用。價格由5,990日幣至16,940日幣。

每個麵包燈都係由麵糰開始製作,首先烤焗出麵包,然後再將麵包底部打開,掏出內部成為空心嘅狀態。將麵包浸透防腐同防霉嘅液體,令麵包更堅固亦唔易變壞,最後裝上LED燈!

除咗麵包燈,仲將印度薄餅轉變為時鐘!印度薄餅時鐘所使用嘅薄餅都係由兵庫縣尼崎市嘅尼泊爾咖哩店Art and Nepal烤製,每個薄餅嘅形狀同烤焦程度都有些微分別,更加獨一無二。

印度薄餅時鐘同樣經過防腐同防霉嘅加工同處理,相對於麵包燈,薄餅嘅質感較柔軟,掛喺牆上會貼住牆壁,吊起就會自然垂下。

印度薄餅時鐘價格為8,580日幣,仲要預約,目前訂單已經排到兩個月後!PAMPSHADE嘅產品寄賣喺日本、美國、法國、英國、香港等多家店舖,網購都買到!

*以上資訊只供參考,如有任何變化或更改均以現場情況或商戶決定為準*

Klook.com
X