日本靜岡市喺2021年3月起，開始推行靜岡塑膠模型化計畫，將廣告板、郵筒，公共電話都化成模型，強化「模型的世界首都」嘅形象，向全世界傳播呢座城市嘅獨特魅力。

好多人應該都唔知道，靜岡市塑膠模型嘅出貨量，佔咗日本全國嘅8成。自去年3月推出嘅靜岡市塑膠模型化計畫，趣味性十足之餘亦成功達到宣傳效果、吸引咗更多遊客。計劃嘅第一彈就打造咗4組1:1大小嘅模型，成為靜岡市嘅「新地標」。

JR靜岡站南口，分別有寫住呢次計畫概要嘅廣告模型，以及「模型的世界首都 靜岡」字樣嘅裝置，仲可以企喺展台上，成為模型嘅一份子、拍照留念。同樣有住「模型的世界首都」字樣嘅紅色塑膠裝置，則喺Twin Messe Shizuoka展覽館前放置。

仲有喺靜岡市役所前嘅紅色郵筒模型，實際亦能投遞郵件。2022年3月，NTT西日本電信公司亦喺JR靜岡站北口，設置咗綠色公共電話模型，有撥打電話嘅功能。呢啲塑膠模型上有001至005嘅編號，可以跟住號碼「收集」模型！

*以上資訊只供參考，如有任何變化或更改均以現場情況或商戶決定為準*