日本有位超具創意嘅設計師結合「國粹桌遊」同「少女甜品」，將士多啤梨蛋糕做成「將棋」造型，還原咗每一隻棋子同時又保有蛋糕嘅樣，太可愛了！

傳說中嘅「士多啤梨蛋糕將棋」！將常見嘅鮮忌廉士多啤梨蛋糕製作成五邊形嘅將棋，喺頂層鮮忌廉寫上「王將」、「飛車」等將棋嘅棋名，擺喺棋盤上疑幻似真，但係一睇側面蛋糕嘅橫切面又有種莫名嘅可愛感～

呢款蛋糕係日本創意設計師「カナイガ」嘅設計概念，將硬梆梆嘅日本國粹桌遊將棋結合可愛嘅士多啤梨蛋糕，令呢款棋更容易親近，激發更多人對將棋嘅興趣。

呢個設計最有趣就係棋子被「食」嘅時候真係可以食咗隻棋！邊捉棋邊食下午茶嘅感覺真係正，輸咗仲可以當場表演吞棋！

呢位設計師都發表過許多唔同嘅作品，大多都係結合食物同少女心嘅創作，包括「粟米戒指」、「POCKY火柴棒」等。

*以上資訊只供參考，如有任何變化或更改均以現場情況或商戶決定為準*